ஏழு ஆண்டுகள் தாமதமான வாக்குறுதி நிறைவேறியது:  வடக்கின் சுகாதாரத் தொண்டர்களுக்குக் கிடைத்த நீதி

ஜீவன் தியாகராஜா

2019 நவம்பர் 25ஆம் திகதி, வடமாகாணத்தின் பல நூறு பெண்களும் ஆண்களும் காகிதத்தில் அரச ஊழியர்களானார்கள். சுகாதார சேவை உதவியாளர் (கனிஷ்ட) தரம் III பதவிக்கான நியமனக் கடிதங்கள் அவர்கள் கைகளில் இருந்தன. போருக்குப் பின் மீண்டெழுந்துகொண்டிருந்த ஒரு பிரதேசத்தின் வைத்தியசாலைகளிலும் சுகாதார நிலையங்களிலும் ஊதியமின்றி ஆண்டுக்கணக்கில் உழைத்ததற்கான வெகுமதி அதுவாகும். சில நாட்களுக்குள்ளேயே அக்கடிதங்கள் பெறுமதியற்றவையாகின.

ஏழு ஆண்டுகளுக்குப் பின்னர், அந்த வாக்குறுதி இறுதியாக நிறைவேறியுள்ளது. CA (Writ) 222/2026 வழக்கில், 2026 ஒக்டோபர் 21ஆம் திகதி, மேன்முறையீட்டு நீதிமன்றம் இணக்கத் தீர்வொன்றைப் பதிவுசெய்தது. அதன்படி 2019இல் நியமிக்கப்பட்ட 389 பேருக்கும் நிரந்தரமான, ஓய்வூதியத்துடன் கூடிய புதிய நியமனக் கடிதங்களை வடமாகாண சபை வழங்கும். பொதுச் சேவை தொடர்பான முறைப்பாடுகள் தீர்க்கப்படுவதைவிடப் புதைக்கப்படுவதே வழக்கமாகிவிட்ட ஒரு நாட்டில், இது ஓர் அற்புதமே.

கண்ணுக்குத் தெரியாத பணியாளர்கள்

போர் முடிந்ததும் வடக்கில் பொதுச்சுகாதார மருத்துவமாதுகளுக்கும் கனிஷ்ட சுகாதார ஊழியர்களுக்கும் கடும் பற்றாக்குறை நிலவியது. சுகாதார வைத்திய அதிகாரி பணிமனைகளும் வைத்தியசாலைகளும் தொண்டர்களைக் கொண்டு அந்த இடைவெளியை நிரப்பின. அவர்கள் மருத்துவமாதுகளுக்கு உதவினர்; தடுப்பு மற்றும் சிகிச்சைச் சேவைகளை வழங்கினர்.

ஆனால் விதிமுறைகளின் பார்வையில் அவர்கள் சேவையில் இல்லாதவர்களாகவே இருந்தனர். 2014ஆம் ஆண்டின் 25ஆம் இலக்க பொது நிர்வாகச் சுற்றறிக்கை நிரந்தர நியமனத்துக்கான வழியைத் திறந்தபோது, அது பதில், தற்காலிக, ஒப்பந்த ஊழியர்களுக்கு மட்டுமே உரியதாக இருந்தது. 180 நாள் சேவைத் தேவையைப் பூர்த்திசெய்திருந்தும், ஒரு தொழில்நுட்பக் காரணத்தால் தொண்டர்கள் வெளியே தள்ளப்பட்டனர்.

உடைந்த நம்பிக்கைகளின் நீண்ட பாதை

2017இல் இவ்விடயம் ஜனாதிபதி செயலகம் வரை சென்றது; 820 தொண்டர்களின் பெயர்ப்பட்டியல் சமர்ப்பிக்கப்பட்டது; எந்தப் பலனும் கிட்டவில்லை. 2019 மார்ச்சில் 454 சுகாதார சேவை உதவியாளர் பதவிகளுக்கு முகாமைத்துவ சேவைகள் திணைக்களம் அனுமதி வழங்கியது. ஜனாதிபதித் தேர்தலுக்கு இரு மாதங்களுக்கு முன்னர் 1,923 பேரின் பட்டியல் நேர்முகப் பரீட்சைக்கு அனுப்பப்பட்டது. அதில் 1,631 பேர் பங்கேற்றனர்; 389 பேர் தெரிவுசெய்யப்பட்டு நவம்பரில் நியமனக் கடிதங்களைப் பெற்றனர்.

தேர்தல் முடிவு வெளியானதும் நியமனங்கள் நிறுத்திவைக்கப்பட்டன. டிசம்பர் 20இல் திறைசேரி ஆட்சேர்ப்பை நிறுத்தியது. 2020இல் வெளியான புதிய சுற்றறிக்கை, இத்தகைய ஆட்சேர்ப்புகள் பல்நோக்கு அபிவிருத்திச் செயலணிக்கூடாக மட்டுமே நடைபெற வேண்டும் எனக் கட்டளையிட்டது.

2021 மார்ச்சில் ஆளுநர் சார்ள்ஸ் இதனை மனிதாபிமான அடிப்படையில் விசேட விடயமாகக் கருதுமாறு ஜனாதிபதியிடம் கோரினார். பயனில்லை. இன்னும் மோசமாக, சில கோப்புகளிலிருந்து நியமனப் பதிவுகள் காணாமல் போயின; உண்மை தெரிந்த சில அதிகாரிகள் அதைச் சொல்லத் தயங்கினர்.

வீதிப் போராட்டம்

பெண் தொண்டர்கள் போராட்டத்தை கைவிட்டுப்போவதற்கு  மறுத்தனர். ஆளுநர் செயலகத்துக்கு வெளியே வீதியோரத்தில் ஆறு மாதங்களுக்கு மேலாக, வெயிலிலும் மழையிலும், அமைதியான போராட்டத்தை நடத்தினர்.

2021 ஒக்டோபரில் பதவியேற்ற ஆளுநர் அவர்களைச் சந்தித்து, காணாமல்போன ஆவணங்களை மீளமைத்து, அவர்களின் கோரிக்கையைக் கையிலெடுத்தார். தேசிய மக்கள் சக்தி அரசாங்கம் பதவியேற்ற பின்னர் சுகாதார அமைச்சரிடம் உண்மைகளை உறுதிப்படுத்தியதோடு, மனித உரிமைகள் ஆணைக்குழுவுக்கும் விடயத்தைக் கொண்டுசென்றார்.

இந்தப் போராட்டத்தின் முடிவைக் காண எல்லோரும் உயிரோடில்லை: 389 பேரில் இருவர் உயிரிழந்துவிட்டனர்; அவர்களில் ஒருவர் நீண்ட காத்திருப்பின் விரக்தியில் தன்னுயிரை மாய்த்துக்கொண்டதாக நம்பப்படுகிறது.

இந்த ஏழு ஆண்டுகள் வெறும் எண்கள் அல்ல. இவர்களில் பலர் போரில் கணவரை, பிள்ளைகளை, வீடுகளை இழந்த குடும்பங்களைச் சேர்ந்தவர்கள். நியமனக் கடிதம் கிடைத்த நாளில் அவர்கள் தம் குடும்பத்துக்கு ஒரு நிலையான வருமானம், பிள்ளைகளுக்கு ஒரு பாதுகாப்பான எதிர்காலம் கிடைத்துவிட்டது என்று நம்பினர்.

அந்த நம்பிக்கை பறிக்கப்பட்டபோது, சிலர் கடன்பட்டனர்; சிலர் வேறு வேலைகளைத் தேடி அலைந்தனர்; பலர் வயதைக் கடந்து, அரச சேவைக்கான வாய்ப்பையே இழக்கும் நிலைக்குத் தள்ளப்பட்டனர். ஆயினும் அவர்கள் தமது உரிமைக்கான போராட்டத்தைக் கைவிடவில்லை.

தீர்வு வழங்குவது என்ன?

மத்திய சுகாதார அமைச்சு வழங்கிய அதிகாரத்துடன், வடமாகாண சபை தனது பதவி வெற்றிடங்களுக்குள் இந்நியமனங்களை முறைப்படுத்தும்.

தீர்வின்படி:

  • 389 பேருக்கும் புதிய நியமனக் கடிதங்கள், எதிர்கால அடிப்படையிலும் அவரவருக்குத் தனிப்பட்ட அடிப்படையிலும், நிதிப் பிரமாணங்களுக்கும் அரச சேவை ஆணைக்குழு நடைமுறை விதிகளுக்கும் அமைய வழங்கப்படும்.
  • இரு மாதங்களுக்குள் தனிப்பட்ட விபரங்கள் சரிபார்ப்பும் உடல், உளத் தகுதி நேர்முகப் பரீட்சையும் நடைபெறும்.
  • 2019இல் 45 வயதுக்குக் குறைந்தவர்கள் நிரந்தர, ஓய்வூதியத்துடன் கூடிய பதவிகளைப் பெறுவர்; ஓய்வூதியம் புதிய நியமனத் திகதியிலிருந்து கணக்கிடப்படும்.
  • 45 வயதுக்கு மேற்பட்ட 33 பேர் அரச சேவை சேமலாப நிதியத்தின் (PSPF) ஓய்வுகால நலன்களுக்குத் தகுதிபெறுவர்.

இரு விடயங்கள் சிறப்பாகப் பாராட்டுக்குரியவை. மனுதாரர்களால் 183 நியமனக் கடிதங்களை மட்டுமே சமர்ப்பிக்க முடிந்தபோதும், அரசு தனது சொந்த 2019 பதிவுகளில் இருந்த 389 என்ற எண்ணிக்கையையே ஏற்றுக்கொண்டது. அடுத்தது ஓய்வூதியம்: எட்ட முடியாதது என்று கருதப்பட்டது இன்று கைகூடியுள்ளது.

மனச்சாட்சியின் விடயம்

கோப்புகள் தாமாகத் தொலைவதில்லை; கூட்ட அறையில் மௌனம் காப்பதும் ஒரு தெரிவே. இந்த ஏழு ஆண்டுகளில் சில அரச ஊழியர்கள் வழியில் தவறிவிட்டனர். ஆனால் இம்முறை, ஒரு சில நல்ல மனிதர்கள் பதிவுகளுக்கும் தமது மனச்சாட்சிக்கும் விசுவாசமாக இருந்ததால்தான் நீதி கிடைத்தது. பாதிக்கப்பட்டவர்களுக்கு அந்த அறையில் குரல் இல்லாதபோது, அரச ஊழியர்கள் நேர்மையாகவும் தமது மனச்சாட்சிக்கு உண்மையாகவும் இருக்க வேண்டும்.

அரச சேவை என்பது அதிகாரத்தில் இருப்பவர்களுக்குச் சேவை செய்வதல்ல; மக்களுக்குச் சேவை செய்வதே. ஓர் உத்தியோகத்தர் ஒரு கோப்பைப் பாதுகாக்கும்போது, ஓர் உண்மையைப் பதிவுசெய்யும்போது, ஒரு கூட்டத்தில் துணிந்து பேசும்போது, அவர் ஒருவருடைய வாழ்க்கையையே மாற்றக்கூடும். இந்த வழக்கு அதற்கொரு சான்று. எதிர்கால அரச ஊழியர்கள் இதிலிருந்து பாடம் கற்க வேண்டும்.

நன்றிக்குரியவர்கள்

மனுதாரர்களின் சட்டத்தரணி கே.எஸ். ரத்னவேல் அவர்களுக்கு முதற் பாராட்டு. வீதியோரப் போராட்டத்தை நீதிமன்றில் வாதிடக்கூடிய உரிமைக் கோரிக்கையாக மாற்றி, காணாமல்போன கோப்புகளுக்கும் தயங்கிய சாட்சிகளுக்கும் மத்தியில் பொறுமையுடனும் நுணுக்கத்துடனும் வழக்கை நடத்தினார். அரச தரப்பினரும் பாராட்டுக்குரியவர்கள்: ஆளுநர், பிரதம செயலாளர், மாகாண சுகாதாரச் செயலாளர், சுகாதார அமைச்சு அதிகாரிகள், சட்டமா அதிபர் திணைக்களம். அவர்கள் இறுதி மேன்முறையீடு வரை போராடியிருக்கலாம்; மாறாக, தவறை உணர்ந்து அதைச் சரிசெய்யத் தெரிவுசெய்தனர். பொறுப்புள்ள அரசாட்சி என்பது இதுவே.

இன்னும் செய்ய வேண்டியவை

நியமனங்கள் எதிர்காலத்திலிருந்தே அமுலாகின்றன; 2019 முதல் இன்றுவரையான ஆண்டுகள் ஓய்வூதியத்துக்கோ சிரேஷ்டத்துக்கோ கணக்கிடப்படாது. எனவே சரிபார்ப்பு புதிய தடையாக அல்லாமல் கருணையுடன், உரிய காலத்துக்குள் நடத்தப்பட வேண்டும்.

நீதிமன்றில் பதிவான தீர்வு காகிதத்தில் மட்டும் நின்றுவிடக்கூடாது. 2019இல் கடிதங்கள் வழங்கப்பட்டும் அவை நடைமுறைக்கு வராத கசப்பான அனுபவம் இன்னும் மறக்கப்படவில்லை. எனவே வடமாகாண சபையும் சம்பந்தப்பட்ட அனைத்துத் தரப்பினரும் இரு மாத காலக்கெடுவைக் கண்டிப்பாகப் பின்பற்றி, ஒவ்வொருவரும் தமது பணியிடத்தில் கடமையேற்கும் வரை இவ்விடயத்தைக் கண்காணிக்க வேண்டும்.

நியமனம் வளர்ச்சியின் தொடக்கமாகவும் அமைய வேண்டும். இவர்களைச் சான்றிதழ் பெற்ற பராமரிப்புப் பணியாளர்களாகப் பயிற்றுவிப்பதற்கான முன்மொழிவும் பாடத்திட்டமும் தற்போதைய ஆளுநரிடம் சமர்ப்பிக்கப்பட்டுள்ளன.

NAITA பாடத்திட்டத்தின்படியான NVQ நிலை 3 பராமரிப்பாளர் கற்கைநெறி, கிளிநொச்சி, முல்லைத்தீவு, வவுனியா, மன்னார் மாவட்டப் பொது வைத்தியசாலைகளிலும், தெல்லிப்பழை, பருத்தித்துறை ஆதார வைத்தியசாலைகளிலும் தலா குறைந்தது 40 பேருக்கு நடத்தப்படும். 120 மணிநேரக் கற்கை, தடுப்பு மற்றும் சிகிச்சைப் பராமரிப்பு, உளநலம், முதியோர் மற்றும் விசேட தேவையுடையோர் பராமரிப்பு, நோயாளர்களைப் பாதுகாப்பாகக் கொண்டுசெல்லல், போஷாக்கு, தொற்றுத் தடுப்பு ஆகியவற்றை உள்ளடக்கும்.

 நன்கொடையாளர் புலமைப்பரிசில்களுடன் குறைந்த அல்லது இலவசக் கட்டணத்தில் வழங்கப்படும் இப்பயிற்சி, 389 பேருக்குள் அடங்காத ஏனைய தொண்டர்களுக்கும், உள்ளூர் வைத்தியசாலைகளுடன் இணைந்த பராமரிப்புப் பணியாளர் கூட்டுறவுகளூடாக, கௌரவமான வேலைவாய்ப்பைத் திறக்கலாம்.

தேர்தலுக்கு முன் அவசரமாக வழங்கப்பட்டுப் பின்னர் இரத்துச்செய்யப்படும் நியமனங்கள் உண்மையான மனிதர்களுக்கு உண்மையான தீங்கிழைக்கின்றன. அரச பதிவுகள் ஒருபோதும் மறைந்துபோகக்கூடாது. ஆயினும் இன்று, இந்த நல்ல செய்தியில் சற்று நிதானிப்போம். ஒருகாலத்தில் வீதியோரத்தில் அமைதியாகப் போராடிய பெண்கள், விரைவில் நிரந்தர அரச ஊழியர்களாக வைத்தியசாலைகளுக்குள் நுழைவார்கள். 2019இல் அளிக்கப்பட்ட வாக்குறுதி, இறுதியாக நிறைவேறுகிறது.

Leave A Comment